کاش (ایک نثری نظم) - Kash Asangani Mushtaq Rafeeqi

کاش!! (ایک نثری نظم)

اسانغنی مشتاق رفیقیؔ

ستائیس سال بعد ابو کی قبر میں

پھو پھو کو دفنا کر

اٹھارہ سال بعد امی کی قبر میں

مامو کو دفنا کر

مجھ میں یہ احساس

شدت سے جاگنے لگا ہے کہ

میری امی اور ابو جو ان قبروں میں دفن تھے

جنہیں میں نے خود ان ہاتھوں سے دفنایا تھا

کہاں گئے؟

کیا وہ سچ مچ مٹی ہوگئے!!

کیا ان کی وہ مخلص نظریں

وہ پیار لٹاتی بانہیں،

وہ محبت بانٹتے ہاتھ

وہ شفقت نچھاور کرتے لہجے

سب فنا ہوگئے

اگر ایسا ہی ہے اور یقینا ایسا ہی ہے

تو میں کیا ہوں

ان کے وجود کا ایک حصہ

پر ان سے مختلف

اور ایک دن میں بھی

انہیں کی طرح مر کر مٹی ہوجاؤں گا

اور میری اولاد

میرے وجود کا ایک حصہ

پر مجھ سے مختلف

ایک کہانی کے کردار کی طرح

اس کھیل کو آگے لے کر جائے گی

اور یہ چکر چلتا رہے گا!

چلتا رہے گا!!

میرے امی ابو اوران کے امی ابو

اسی طرح صدیوں صدیوں

مٹ مٹ کر بھی

مٹی ہو کر بھی

پیدا ہوتے رہیں گے

کسی وجود کا حصہ بن کر

جیتے رہیں گے

مگر ہر بار خود سے مختلف

اپنی انفرادیت فنا کر کے

کاش اے کاش! میں پیدا ہی نہ ہوتا!

اور اس چکر کا حصہ ہی نہ بنتا!

کاش اے کاش!!

Kash

Asangani Mushtaq Rafeeqi

Satais saal baad Abbu ki qabar mein

Phuphu ko dafna kar

Athaara saal baad Ammi ki qabar mein

Mamu ko dafna kar

Mujh mein yeh ehsas

Shiddat se jaagne laga hai ke

Meri Ammi aur Abbu jo un qabron mein dafan thay

Jinhein mein ne Khud in hathon se dafnaya tha

Kahan gaye

Kya woh sach much mitti hogaye

Kya un ki woh mukhlis nazrain

Woh pyar lutati baahein

Woh mohabbat banttay haath

Woh shafaqat nichhawar karte lehjey

Sab fanaa hogaye

Agar aisa hi hai aur yaqeenan aisa hi hai

To mein kya houn

Un ke wujood ka aek hissa

Par un se mukhtalif

Aur aek din mein bhi

Inhen ki tarhan mar kar mitti hojaoun ga

Aur meri aulaad

Mere wajood ka aek hissa

Par mujh se mukhtalif

Aek kahani ke kirdaar ki tarha

Is khail ko aagay le kar jaye gi

Aur yeh chakkar chalta rahay ga

Chalta rahay ga

Mere Ammi Abbu aur in ke Ammi Abbu

Isi tarha sadiyoun sadiyoun

Mit mit kar bhi

Mitti ho kar bhi

Paida hotay rahen ge

Kisi wajood ka hissa ban kar

Jeetay rahen ge

Magar har baar khud se mukhtalif

Apni infiradiat fanaa kar ke

Kash ae kash! mein paida hi nah hota

Aur is chakkar ka hissa hi nah bantaa

Kash ae kash

……