شہیدانِ کربلا - Shaheedan e Karbala

شہیدانِ کربلا

لاکھوں میں بہتّر کا ہُنر بول رہا ہے

یہ ان کی شہادت کا اثر بول رہا ہے

مسکین ہیں بےبس ہیں، نہتّے ہیں مسافر

چہروں سے کہاں رنجِ سفر بول رہا ہے

اب اس سے زیادہ ہو کیا توہین یزیدا!

نیزے کی بلندی پہ بھی سر بول رہا ہے

سیراب میرے خوں سے ہوا دشتِ بلا سب

معصوم یہ پیاسے کا جگر بول رہا ہے

ماتم اسے کہتا ہے جو ماتم کی ہے توہین

دل ہے کہ یہ بے خوف وخطر بول رہا ہے

ہم سایہ ادھر بھوک سے مرنے کو ہے تیار

لنگر یہ مرے گھر میں اِدھر بول رہا ہے

مقصد یہ شہادت کا سمجھ پاتے جو نازاؔں

کہتے کہ یہ حق ہے جو بشر بول رہا ہے

______

جبیں نازاؔں

لکشمی نگر ، نئی دہلی