تجھ کو ترتیب میں لاتی تجھے یک جا کرتی : غزل اردو شاعری

غزل

تجھ کو ترتیب میں لاتی تجھے یک جا کرتی

تو جو ملتا تو ترے واسطے کیا کیا کرتی

دسترس میں بھی ، کسی کی نہیں آنے دیتی

ساری دنیا سے چھپا کر تجھے دیکھا کرتی

اے کہ سانسوں میں بسے شخص ! یقیں کر میرا

میں ترے ناز اٹھاتی ، تری پوجا کرتی

پہلی خواہش پہ بھی ، تو مجھ کو میسر آیا

دوسری بار بھی تیری ہی تمنا کرتی

تو مجھے توڑنے کا جب بھی ارادہ کرتا

میں ، زمانے ! تری یلغار کو پسپا کرتی

کاش لوٹ آتے کسی طور وہ بیتے ہوئیے دن

پھر ترے نام کے خط خون سے لکھا کرتی

یہ تو ممکن ہی نہ تھا ، تیری رفاقت کے بغیر

زندگی کا یہ سفر ، میں تن-تنہا کرتی

کس قدر رنج سہے تو نے ، کسی کی خاطر

ساتھ ہوتی تو ترے غم کا مداوا کرتی

شہناز کوثر