پنجابی غزل
خرچہ نہیں ہندا کدے پورا ایتھے گھار دا
لوڑاں والا دریا اے نت ٹھاٹھاں مار دا
کسے دے وی کم کوئی آوندا نہیں جہان تے
جنہوں ویکھو اوہو ایتھے بتا پیا سار دا
مک جان دنیا توں قتلاں دے کم اے
ڈر ہووے دنیا تے کسے نوں جے دار دا
ظلم دا نظام جو مسلط اے غریب تے
ماڑے تائیں ڈوبدا تے تگڑیاں نوں تار دا
ظالماں نیں ظلم دی اخیر کیتی ہوئی اے
قلماں تے پہرہ تے منہ بند اظہار دا
دوجیاں نوں نند تے نہ اچے بول بول توں
سر نیواں ہندا اے غرور تے ہکار دا
لبھدیاں گرجاں نیں نت مردار نوں
باز مزہ لیندے نت تازہ ای شکار دا
ویری مینوں کردے گران دیاں کوششاں
پلہ میں وی چھڈدا نہیں آقا سرکار دا
کسے وی میدانے مار کھاندا نہیں او آتشا
پکا ہووے بندہ جیہڑا قول تے قرار دا
الیاس آتش پاکستان
۔۔۔۔۔
0 تبصرے